فوسط واحد الدار و لا نقدو نقولو غي دويرة صغيرة فيها جوج بيوت و مراح ضيق كوزينة مشروكة مع البيت .. و طواليط صغيرة فيها شقمة وحدة .. جالس المعطي فوق الحصيرة الخضرا .. لي فوقها بطانية رمادية مخططة بالخضر و صفررر ..تهردات و عفى عليها الزمن ..
جالس مسرح على طولتو ..و ناشر رجليه لي خاشيهم فتقاشر و كيبان صبعو الكبير كيطل من واحد التقبة ..
متكي ذراعو على المخدة .. و شاد سبسي بيد لاخرى كيبخ دخاخن عليهم و يلوي ف موسطاشو بغيظ ..

فالجنب لاخر جالسا بنتو صفية لي آااااية ف الجمال .. عاد كملت 18 عاااام ..
شعر طويل و مسبسب على كتيفاتها متموج من الأطراف .. و كيبري .. لونو عسلي..و مخبي وجهها الملائكي ..فاش كتحني راسها ..
نيفها صغيور ..و شنايفها مطيبزين .. جامعا شي خصلات.. ب مقبط ف الغوز.. د الميكا على شكل فراشة.. و مخليا لاخر نازل .. لابسا كسيوا طويلا فزرق باااهتا بقوة تصبين و مرسومين فيها شي وردات فالغوز لي تحكو و مابقاوش باينين ..

جامعا رجيلاتها عندها ..و كتجر عليهم الكسوة ..كثر و كثر ..و عينيها زرقين كي لون “صافير”.. كبار ماشاء الله.. ايلا تعمقتي فيهم كتحس بالراحة و نتا كتمعن فديك زروقيا النااااعمة مرة مرة كتمزج بلون خضر خفيييف.. الوجه بيض و صااافي .. و الحجبان مقادين من عند الله .. لي شافها و شاف باها يحلف عليها ماشي بنتو و لا تقربو شي حاجة ..

ماشبهاتو فحتا حاجة لا فالطبع و لا فالوجه ..بقاات كتشوف ف الأرض ..
مرة مرة كطلع عينيها تشوف ف باااها سرررقة .. و ترجع تحدرهم بزرررربة .. ريحة دوك دخاخن خنقتهااا و لكن شعندها ماتقول عارفة باها جلاااخة و مكيدير بحساب حددد و خص غي لي ينغزو باش يسب و يلعن ..
شادة كتاب فيديها و دفتر و كتكتب فصمت مطبق .. كيتوردو حنيكاتها و كتزيد تصفا زرقة عينيها لي كتسحر منين تسها بيهم فنقطة مجهولة .. كيرجعو كي جزر المالديف .. خص غير لي يزعم و يبحر فيهم و يغوص ف قعرررهم ..

المعطي(كيلعب بشواربو مطلع عينو فيها و حجبانو مزديين خط واحد ناوي على خزِيييت) ياك كنقوليك غطي داك راااااس .. و لا عاجبينك سواااالفك !

ناضت بزربة بلا تا حررررف .. جمعت شعرها و جابت ذرتها المرررقعة .. خبات داك شعر لي كي الحرير .. نااااعم و كثير .. مهزتش فيه الشوفة مزال ..

المعطي ؛ يواااا هاكاك .. و لاشي نهار نكرض ليك دوك زغبات لي فرحانة بيهم من الجددددر .. (دفل و كشاكشو خارجين و جلس كيتمتم و هو كيسب مرة فخاطرو و مرة ف العلن)

صفية صقلت و يدها كترررعد و هي كتخطط فداك دفتااار .. عندها فقر الدم الحااااد ..شي لي كيخلي يديها ديما يترعدو غير بوحدهم .. و هملووووها بزاف شهراين باش سالا ليها دواها و مشراااوهش ليها..
و تا هي محكرررتش عارفة غير كتخوي الما على رملة .. و مكاينش لي قاري همها تا هاذا لي باها غير بالسمية ..
و لي زايد طين بلة ..هو ضيقة ..و الحساسية.. لي عندها من تيد و جافيل ..و كاع المساحيق د التصبيييين .. ايلا غير شمت ريحة جافيل .. تبات مخنوقة .. و مقجوووجة .. بحالا واقف عليها ملاك الموووت .. شي لي مخلي صحيحتها غيييي على قد الحااال .. دغيا تمرض و مناعتها قليلة ..
و كاتزييييد تكمل.. فاش كتشم هاذ ريحة سبسيييي ..
و لكن رجاها ف الله .. اش عندها ما دير ..